刀仔锯大树,曾志伟买马只系用咗2,000蚊,就赢咗1,600万返嚟,易过中六合彩,即刻搞到一地花生同葡萄,个个都当渠赌神,将不可能变可能!虽然有话唔赌唔知时运高,但我Nuts哥绝对唔鼓吹大家赌博,只系相信富贵逼人,运气慨嘢真系冇得讲!虽然志伟个老友谭咏麟成日话志伟屎忽撞棍啫,但你睇志伟另一个老友阿叻(陈百祥)够系专家,够日日睇晨操啦!我谂阿叻见志伟呢招「盲拳打死老师傅」,都会不禁讲一句:「咁都得?」睇怕以后都系瞓多两粒钟,又或者晨鸡咁早起身,都系饮个早茶暖吓肚好过嘞!
 
有人就话志伟住正间风水屋财源滚滚,有口痕友直情同我Nuts哥讲:「渠之前输埋输埋冇人知啫!」、「渠本身大把水,唔志在啦!」都话依家好多人憎人富贵厌人贫㗎啦!志伟系有米,但我Nuts哥就唔信1,600万对渠嚟讲系散银啰!计我话,个个咁多理论马后炮,一时又话志伟行运,一时又话志伟转数快、数口劲,不如叫志伟做过江龙,过大海同近排传闻赢过亿慨神秘女赌神赌番铺,嚟番场真正慨赌城风云,等大家睇吓女赌神罗庚劲,定系志伟神算醒!
 
阅女无数!晒心口都嘥气!
 
澳门赌场近排出现一个神秘女赌神日日玩百家乐,坚系日日易赏钱,轻轻松松邓梓峰就赢咗过亿!传闻话呢个女赌神出手又狠又准又忍得,一唔啱心水就叫荷官飞牌飞到头都晕,睇准先出手落注!仲话赌场用尽科技研究呢位女赌神有冇出蛊惑,但睇极都冇漏洞,仲拖低某赌场慨业绩,令唔少赌场闻风丧胆!查实一铺买300万,手风旺起嚟赢过亿都唔难!尤其对于一个职业赌徒嚟讲,点玩、使几钱玩、玩啲咩,全部都系计数,冇得靠运气!
 
虽然未知呢位女赌神何方神圣,早排仲流传渠慨「真身」相片,身材同赌术一样「胸狠」,不过好快就话另有其人!如果搵志伟做荷官,真系有得谂喎!渠行出嚟个样咁卡通已经够搞笑,讲气场一定劲过女赌神!就算女赌神大胸又点?志伟阅女无数,大胸、平胸、有线、冇线都冇有怕,你心口拉低几寸玩转移视线、换牌换几廿次又点?唔惊!志伟出名口臭,把声又够刺耳,你一换牌我又寸吓你窒到应,得闲又搞吓烂Gag,奖门人上身同你讲句:「Super!」唔笑死都吓亲!志伟有咁多红颜知己,真系贪渠靓仔咩?就系因为渠口技强劲条脷识转弯!不费吹灰之力用吓冧功,刚柔并重,九浅一深,女赌神仲唔投降?睇怕个女赌神全程唔系冧到震,就系笑到喷饭、牌都揸唔稳,都好难专心落注嘛?分分钟开心到系咁易玩两铺就收手皆大欢喜,直情同志伟摸吓酒杯底交流吓马经仲实际喎!
 
自嘲零包袱抵你发达!
 
唔好睇志伟身高五呎多少少,查实佢做武师入行,真系估你唔到,做做吓变埋男主角兼坚有戏做埋影帝!志伟短小但坚精悍,仔女成材,老婆都有两个,都唔系个个可以做到,志伟讲过:「讽刺自己,系人生最好慨润滑剂。」好老实,可以唔怕瘀连自己都笑埋一份,唔系话厚面皮咁片面,即系做人拎得起放得低,咁先至开心!所以志伟畀人问赢咁多钱,渠都只系话当系数字游戏一场,觉得开心同感恩,善事继续做,仲话唔信咩风水屋,存好心做好事,行运自然风水好咁话!呢句真系坚㗎,个人有Heart有正能量,做乜都零舍顺利,呢个先至系真正慨发达秘笈!