千术
教师:好喇,之后讲骰仔。一粒骰仔有几多面?
学生: 6面。
教师:系喇!上面分别印上1、2、3、4、5同6点。咁我想问掷到「6」慨概率系几多?
掷到「6」点慨意思系6点慨一面向上。大家应该都知啦!
学生: 6分之1。
教师:咁掷到「1」呢?
学生:都系6分之1。
教师:如果我话你哋听掷到每一面慨概率都唔一定系6分之1,大家会唔会想打我?
学生:绝对会!
教师:咁呀……其实大家都错唔晒慨。只不过我哋喺讲掷到每一面都系6分之1慨时候背后有个假设,就系呢粒骰仔系「匀称」慨。
「匀称」慨意思系骰仔慨每一面都有相等慨重量。你话,骰仔慨重量同渠掷出嚟慨概率有咩关系?
(众默。)
教师:大家试谂吓如果一面重啲,一面轻啲,咁掷出嚟自然重嗰边向下慨机会大啲,即系轻嗰面向上慨机会大啲,自然有较大慨机会掷到轻嗰面。
事实上,粒骰仔上面有啲窿,1点有1个窿,6点有6个窿,自然有6个窿呢面会轻啲,因为渠被取走慨部分多咗。所以理论上,掷到6慨机会自然大啲。
不过当然呢个偏差好细,所以我哋一般假设一粒骰仔系匀称慨,或者叫「公平骰子」。
讲到呢度,讲多少少得意嘢比大家听。
学生:好呀!
教师:以前啲人点样「出老千」呃人啲钱呢?例如你同我赌钱,你买掷到6,之后我呢个老千喺6嗰一面加啲铅落去,铅即系一种金属。咁加咗铅之后6嗰一面自然重咗,所以出现慨机会就细咗,我自然有较大慨胜算,可以呃渠慨钱喇!
讲到呢度你一定会质疑老师,点样呢头先话买6,嗰就加啲铅落去,你估嗰嗰人盲慨咩?
嗱!同学,你要知道以前啲老千系好聪明慨,聪明过你,聪明过我。渠喺粒骰仔度做手脚,中间掘空咗3条管道,放一粒用铅造慨金属波入去。之后你话买6,就将粒金属波通过条管道运去6嗰面。
之后我预咗同学又会质疑我,咁喺你面前将粒骰运嚟运去,当你傻慨咩?
嗱!同学,都话啲老千系好聪明慨。你话买6之后渠就将6嗰面偷偷向下,之后攞住粒骰拜吓四角,又吹淡气入去,整色整水。之后好大力一拍粒骰:「求神保佑!」之后粒金属波自然跌咗落6嗰面,你以为我迷信、拜神,其实已经出咗老千,呃大家钱!
所以话大家千祈唔好沉迷赌博,因为呢个世间好多老千。

 

呢个世界真系好多老千!